Gweithio tuag at gael darpariaeth gofal plant ddigonol' ...

Deddf Gofal Plant 2006 sydd wrth wraidd y ddogfen "Ar Gyfer Plant y mae Gofal" sef Strategaeth Gofal Plant Llywodraeth Cynulliad Cymru, sy'n rhoi rôl allweddol i awdurdodau lleol o ran pennu ffurf eu marchnad gofal plant leol. Mae'n atgyfnerthu’r bartneriaeth â darparwyr yn y sector preifat, y sector gwirfoddol, y sector annibynnol a'r sector a gynhelir sy'n angenrheidiol i greu marchnad gofal plant gref, gynaliadwy ac amrywiol sy'n diwallu anghenion rhieni a gofalwyr.

O Ebrill 2008 ymlaen, bydd yn ddyletswydd statudol ar bob awdurdod lleol i sicrhau darpariaeth gofal plant ddigonol ar gyfer rhieni a gofalwyr yn ei ardal, i'r graddau y mae hynny'n ymarferol ac yn rhesymol. I baratoi ar gyfer y ddyletswydd hon, mae'n rhaid cynnal asesiad manwl o'r ddarpariaeth gofal plant yn yr ardal a'r galw am y ddarpariaeth honno.

Yn Sir Gaerfyrddin, aed ati i asesu digonolrwydd y ddarpariaeth gofal plant rhwng Mawrth a Hydref 2008. Roedd mwy na 700 o rieni wedi cymryd rhan yn yr Asesiad. Nawr, mae'n ofynnol i Gyngor Sir Caerfyrddin ymgynghori ynghylch y fersiwn drafft o'r Asesiad er mwyn rhoi cyfle i rieni, plant, darparwyr, cyflogwyr a'r gymuned ehangach leisio'u barn ynghylch yr asesiad a thynnu sylw at faterion perthnasol. Gellir lawrlwytho copi o'r Asesiad o Ddigonolrwydd y Ddarpariaeth Gofal Plant a'r holiadur ymgynghori isod.

Asesiad o Ddigonolrwydd Gofal Plant, Sir Gaerfyrddin (Hydref 2008) (5Mb) Asesiad Digonolrwydd Gofal Plant Ymgynhoriad (150kb)

Mae'r Asesiad yn manylu ynghylch y cyflenwad a'r galw yn y sir gyfan. Mynd i'r afael ag anghysonderau yn y cyflenwad gofal plant a'r galw amdano yw nod yr Asesiad. Bydd yn rhaid cael rhagor o leoedd gofal plant mewn rhai rhannau o'r Sir; i gyflawni'r nod hwn bydd yn rhaid i'r broses a ddefnyddir adeiladu ar y ddarpariaeth bresennol er mwyn datblygu marchnad gofal plant leol gadarn a chynaliadwy heb beri anfantais i'r rheiny sydd eisoes yn darparu gofal plant o safon.

Bydd y cyfnod ymgynghori yn para o: 10fed Tachwedd – 19eg Rhagfyr 2008.

Datblygir cynllun gweithredu mewn partneriaeth dros y misoedd nesaf er mwyn ceisio rhoi'r argymhellion a bennwyd yn yr Asesiad o Ddigonolrwydd y ddarpariaeth Gofal Plant yn Sir Gaerfyrddin ar waith.

I gael rhagor o wybodaeth ynghylch Asesiad o Ddigonolrwydd y ddarpariaeth Gofal Plant yn Sir Gaerfyrddin, cysylltwch â'r canlynol:

Lisa Morgan, Swyddog y Bartneriaeth Plant drwy ffonio 01267 224283.